शान्ताकारं भुजगशयनं पद्मनाभं सुरेशं,

विश्वाधारं गगनसदृशं मेघवर्णम् शुभाङ्गम्।

लक्ष्मीकान्तम् कमलनयनं योगिभिध्यार्नगम्यम्,

वंदे विष्णुम् भवभयहरं सर्वलोकैकनाथम्,

जय जय सुरनायक जन सुखदायक प्रनतपाल भगवंता,

गो द्विज हितकारी जय असुरारी सिंधुसुता प्रिय कंता,

पालन सुर धरनी अद्भुत करनी मरम न जानइ कोइ,

जो सहज कृपाला दीनदयाला करउ अनुग्रह सोइ,

जय जय अबिनासी सब घट बासी ब्यापक परमानंदा,

अबिगत गोतीतं चरित पुनीतं मायारहित मुकुंदा,

जेहि लागि बिरागी अति अनुरागी बिगत मोह मुनिबृंदा,

निसि बासर ध्यावहिं गुनगन गावहिं जयति सच्चिदानंदा

जेहिं सृष्टि उपाई त्रिबिध बनाई संग सहाय न दूजा,

सो करउ अघारी चिंत हमारी जानिअ भगति न पूजा,

जो भव भय भंजन मुनि मन रंजन गंजन बिपति बरूथा,

मन बच क्रम बानी छाङि सयानी सरन सकल सूरजूथा,

सारद श्रुति सेषा रिषय असेषा जा कहुँ कोउ नहिं जाना,

जेहिं दीन पिआरे बेद पुकारे द्रवहु सो श्रीभगवउाना,

भव बारिधि मंदर सब बिधि सुंदर गुनमंदिर सुखपुंजा,

मुनि सिध्द सकल सुर परम भयातुर नमत नाथ पद कंजा,

जानि सभय सुरभूमि सुनि बचन समेत सनेह,

गगनगिरा गंभीर भइ हरनि सोक संदेह,

जय राम रमारमणं समनं | भव ताप भयाकुल पाहि जनं ||

अवधेस सुरेस रमेस विभो | सरनागत मागत पाहि प्रभो ||१||

दस सीस बिनासन बीस भुजा | कृत दूरी महा माहि भूरी रुजा |

रजनीचर बृंद पतंग रहे | सर पावक तेज प्रचंड दहे ||२||

महि मंडल मंडन चारूतरं | धृत सायक चाप निषंग बरं |

मद मोह महा ममता रजनी | तम पुंज दिवाकर तेज अनी ||३||

मनजात किरात निपात किए | मृग लोग कुभोग सरेन हिए |

हति नाथ अनाथनि पाहि हरे | विषया बन पाँवर भूली परे ||४||

बाहु रोग बियोगन्हि लोग हए |भवदंध्री निरादर के फल ए |

भव सिंधु अगाध परे नर ते | पद पंकज प्रेम न जे करते ||५||

अति दीन मलीन दुखी नितहीँ | जिन्ह के पद पंकज प्रीती नहीं |

अवलंब भवंत कथा जिन्ह कें | प्रिय संत अनंत सदा तिन्ह कें ||६||

नहीं राग न लोभ न मान मदा | तिन्ह कें सम वैभव वा विपदा |

एहि ते तव सेवक होत मुदा | मुनि त्यागत जोग भरोस सदा ||७||

करि प्रेम निरंतर नेम लिएँ |पद पंकज सेवत सुद्ध हिएँ |

सम मानी निरादर आदरही | सब संत सुखी बिचरंति महि ||८||

मुनि मानस पंकज भृंग भजे | रघुवीर महा रनधीर अजे |

तव नाम जपामि नमामि हरी | भव रोग महागद मान अरी ||९||

गुन सील कृपा परमायतनं | प्रनमामि निरंतर श्रीरमणं |

रघुनंदन निकंदय द्वन्दधनं | महि पाल बिलोकय दीन जनं ||१०||

दोहा:

बार बार बर मांगऊ हारिशी देहु श्रीरंग |

पदसरोज अनपायनी भागती सदा सतसंग ||

बरनी उमापति राम गुन हरषि गए कैलास |

तब प्रभु कपिन्ह दिवाए सब बिधि सुखप्रद बास||

भए प्रगट कृपाला दीनदयाला,

कौसल्या हितकारी ।

हरषित महतारी, मुनि मन हारी,

अद्भुत रूप बिचारी ॥

लोचन अभिरामा, तनु घनस्यामा,

निज आयुध भुजचारी ।

भूषन बनमाला, नयन बिसाला,

सोभासिंधु खरारी ॥

कह दुइ कर जोरी, अस्तुति तोरी,

केहि बिधि करूं अनंता ।

माया गुन ग्यानातीत अमाना,

वेद पुरान भनंता ॥

करुना सुख सागर, सब गुन आगर,

जेहि गावहिं श्रुति संता ।

सो मम हित लागी, जन अनुरागी,

भयउ प्रगट श्रीकंता ॥

ब्रह्मांड निकाया, निर्मित माया,

रोम रोम प्रति बेद कहै ।

मम उर सो बासी, यह उपहासी,

सुनत धीर मति थिर न रहै ॥

उपजा जब ग्याना, प्रभु मुसुकाना,

चरित बहुत बिधि कीन्ह चहै ।

कहि कथा सुहाई, मातु बुझाई,

जेहि प्रकार सुत प्रेम लहै ॥

माता पुनि बोली, सो मति डोली,

तजहु तात यह रूपा ।

कीजै सिसुलीला, अति प्रियसीला,

यह सुख परम अनूपा ॥

सुनि बचन सुजाना, रोदन ठाना,

होइ बालक सुरभूपा ।

यह चरित जे गावहिं, हरिपद पावहिं,

ते न परहिं भवकूपा ॥

दोहा:

बिप्र धेनु सुर संत हित,

लीन्ह मनुज अवतार ।

निज इच्छा निर्मित तनु,

माया गुन गो पार ॥

श्री रामचंद्र कृपालु भजु मन

हरण भव भय दारुणम् ।

नवकंजलोचन, कंज-मुख

कर-कंज पद-कंजारुणम् ॥1॥

कंदर्प अगणित अमित छबि,

नवनील-नीरद-सुंदरम् ।

पटपीत मानहु तड़ित रुचि

शुचि नौमि जनक सुता-वरम् ॥2॥

भजु दीनबंधु दिनेश दानव-

दैत्यवंश-निकंदनम् ।

रघुनंद आनंदकंद कोशलचंद

दशरथ-नंदनम् ॥3॥

सिर मुकुट कुंडल तिलक चारु

उदार अंग विभूषणम् ।

आजानुभुज शर-चाप-धर

संग्राम-जित- खर-दूषणम् ॥4॥

इति वदति तुलसीदास शंकर-

शेष-मुनि-मन-रंजनम् ।

मम हृदय कंज निवास कुरु

कामादि-खल-दल- गंजनम् ॥5॥

मनु जाहिं राचेउ मिलिहि सो बरु

सहज सुंदर साँवरो ।

करुना निधान सुजान सीलु

सनेहु जानत रावरो ॥6॥

एहि भाँति गौरि असीस सुनि

सिय सहित हियँ हरषीं अली ।

तुलसी भवानिहि पूजि

पुनि पुनि मुदित मन मंदिर चली ॥7॥

सो० – जानि गौरि अनुकूल सिय हिय हरषु न जाइ कहि ।

मंजुल मंगल मूल बाम अंग फरकन लगे ॥